فراخ بالزبادي والزعفران وصينية البطاطا في الفرن النهارده هنقدّم لكم عزومة مكوّنة من: كوكتيل البرتقال والموز، سلطة الجبنة بالأعشاب، شوربة العدس، وفراخ بالزبادي والزعفران، وصينية البطاطا بالمكسرات..
كوكتيل البرتقال والموز
المقادير:
* 2 كوب عصير برتقال
* موزة
* سكر على حسب الرغبة
الطريقة:
اضربي كل المكونات في الخلاط، وصبّيها في أكواب التقديم.. وبالهنا والشفا.
*******************
سلطة صحية ومفيدة
سلطة صحية ومفيدة
سلطة الجبنة بالأعشاب
المقادير:
* 1/ 2 كيلو جبنة فيتا
* 1/ 4 كيلو طماطم صغيرة
* 2 ملعقة كبيرة زيت زيتون
* حزمة نعناع أخضر
* 3 حزمة جرجير
* عصير 2 ليمونة
* ملح وبهارات
* زعتر أخضر
* حبة خس
الطريقة:
1- اغسلي الأعشاب كويس وقطعيها.
2- اخلطي زيت الزيتون والملح والبهارات مع بعض، وضيفي عليهم عصير الليمون تدريجياً، مع التقليب لغاية ما كلّ المكونات تتجانس.
3- قطّعي الجبنة الفيتا بالشكل اللي إنتِ عايزاه، وحطّيها في طبق غويط، واخلطي معاها باقي الأعشاب والخس، وفي الآخر ضيفي الصوص اللي حضّرتيه وقلّبيهم كويس وقدّميها.. وبالهنا والشفا.
*******************
ممكن تزيّني الطبق بالبقدونس الأخضر
ممكن تزيّني الطبق بالبقدونس الأخضر
شوربة العدس
طبعاً شوربة العدس هي أنسب صنف شوربة للشتاء؛ لأنها بتدّي طاقة عالية جداً وبتدفّي، ده غير إن طعمها لذيذ جداً.
المقادير:
* 1/ 2 كيلو عدس أصفر
* 1/ 8 كيلو بطاطس مقطّعة مكعبات صغيرة
* جزرة مقطّعة مكعبات صغيرة
* 4 كوب شوربة
* 1/ 4 كوب زيت زيتون
* ملح وفلفل وكمون
* ملعقة كبيرة زبدة
* بصلة كبيرة مفرومة
* بصلة صغيرة مقطعة شرائح
* حزمة كرفس مفروم
* 4 فص ثوم
* عصير ليمون
الطريقة:
1- اغسلي العدس كويس وسيبيه منقوع في المية لفترة.
2- شوّحي البصل المفروم والجزر والكرفس والبطاطس مع الزبدة والزيت لمدة 10 دقائق.
3- بعد كده ضيفي العدس والشوربة، وسيبيهم يغلوا مع بعض كويس، وبعد كده قلّلي درجة الحرارة، وسيبيهم على النار لمدة 45 دقيقة.
4- بعد ما تتأكدي إن العدس استوى وبقى طري وباقي الخضار استوى، ضيفي الملح والكمون والفلفل، وسيبي الخليط كله على نار هادية لمدة 10 دقائق كمان.
5- ارفعي الخليط من على النار وسيبيه لغاية ما يبرد، وبعد كده صفّيه كويس، واضربيه في الخلاط.
6- حمّري شرائح البصل في ملعقتين من الزيت؛ لغاية ما لونها يبقى ذهبي، وبعد كده اغرفي العدس في الأطباق وحطّي على الوش شرائح البصل المحمّر وعصير الليمون.. وبالهنا والشفا.
ملحوظة: الطبق ده ممكن يبقى طبق صيامي، لو استبدلنا الشوربة بالماء أو بمرقة الخضار، واستبدلنا الزبدة بالزيت، والطبق ده ممكن نعمله كطبق رئيسي لإنه بيحتوي على كل العناصر الغذائية.
*******************
ممكن تشغّلي شواية الفرن علشان الفراخ تاخد لون الشوي
ممكن تشغّلي شواية الفرن علشان الفراخ تاخد لون الشوي
فراخ بانيه بالزبادي والزعفران
المقادير:
* 1/ 2 كيلو فراخ بانيه
* ملعقة صغيرة زعفران
* ملح وفلفل أسود وكمون
* ملعقة صغيرة كزبرة ناشفة
* ملعقة صغيرة ثوم مفروم
* ملعقة صغيرة بصل مفروم
* ملعقة صغيرة فلفل أحمر مطحون
* ملعقة صغيرة زيت زيتون
* كوب ماء (وممكن تستخدمي ماء الورد)
* كوب زبادي
الطريقة:
1- اعملي فتحات صغيرة في الفراخ، وحطّي كل قطعة بين ورقتين زبدة، ودقّيهم كويس.
2- اخلطي الزعفران مع المية، والزبادي، والملح، والفلفل، والكمون، والكزبرة، والبصل، والثوم، والفلفل الأحمر، وزيت الزيتون.
3- تبّلي قطع الفراخ بالتتبيلة دي، وحطيهم في طبق غويط، وغطّيه كويس، وشيليه في الثلاجة لمدة ساعتين أو أكثر علشان الفراخ تتشرب بالتتبيلة.
4- رُصّي الفراخ في صينية ودخّليها الفرن، وسيبيها لغاية ما تستوي وممكن تشغّلي شواية الفرن علشان الفراخ تاخد لون الشوي.. وبالهنا والشفا.
*******************
ممكن تقدّميها ساخنة أو باردة
ممكن تقدّميها ساخنة أو باردة
صينية البطاطا بجوز الهند والمكسرات
المقادير:
* كيلو بطاطا مسلوقة
* قرفة وزبيب ومكسرات مفرومة
* 2 ملعقة كبيرة جوز هند
* ملعقة صغيرة زبدة
* كوب لبن محلّى
الطريقة:
1- هاتي البطاطا المسلوقة بس خلّي بالك إنها ماتكونش مسلوقة جامد يعني نصف سِوى، واهرسيها كويس.
2- هاتي الصينية اللي هتعملي فيها البطاطا، واخلطيها بالزبدة، وضيفي عليها الزبيب والمكسرات وجوز الهند، وفي الآخر اسقيها باللبن المحلى.
3- دخّلي الصينية في الفرن وسيبيها شوية؛ لغاية ما تحسّي إن وشها احمرّ، وبعد كده طلّعيها وقدميها ساخنة أو باردة.. وبالهنا والشفا.
وبكده تكون خلصت عزومتنا النهارده
أتمنى إنها تكون عجبتكم
وتجرّبوا كل الوصفات اللي قدّمناها
وتبعتوا تقولوا لنا النتيجة كانت إيه
*********************
الرئيسية 
أحدث الصور 
المصحف الجامع
